ଯାଜପୁର, ନଭେମ୍ବର ୪, ୨୦୨୫: ଐତିହାସିକ କଟକ ବାଲିଯାତ୍ରାର ସମୃଦ୍ଧ ସାମାଜିକ-ସାଂସ୍କୃତିକ ମହତ୍ତ୍ୱ ଏବଂ ସାମୁଦ୍ରିକ ନୌବାଣିଜ୍ୟ ଐତିହ୍ୟକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ବିଶେଷ ଭାବରେ ପ୍ରସ୍ତୁତ କରାଯାଇଥିବା ବାଲିଯାତ୍ରା ପ୍ରଜ୍ଞାପନ ମେଢ଼କୁ ଆଜି ଯାଜପୁରରେ ପହଞ୍ଚିବା ପରେ ଜିଲ୍ଲା ଅଧିକାରୀ ଏବଂ କର୍ମଚାରୀମାନେ ଭବ୍ୟ ସ୍ୱାଗତ କରିଛନ୍ତି। ନିର୍ଦ୍ଧାରିତ ସମୟ ଅନୁଯାୟୀ ପ୍ରାୟ ଦିନ ୧୨:୦୦ ଟାରେ ପ୍ରଜ୍ଞାପନ ମେଢ଼ଟି ଜିଲ୍ଲାପାଳ ଙ୍କ କାର୍ଯ୍ୟାଳୟ ନିକଟରେ ପହଞ୍ଚିଥିଲା। ଏହି ସମୟରେ ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ, ଜିଲ୍ଲା ସଂସ୍କୃତି ଅଧିକାରୀ, ଡେପୁଟି କଲେକ୍ଟର, ଆସିଷ୍ଟାଣ୍ଟ କଲେକଟର ଏବଂ ଯାଜପୁର ଜିଲ୍ଲା କାର୍ଯ୍ୟାଳୟ ର କର୍ମଚାରୀଗଣ ଉପସ୍ଥିତ ରହି ସ୍ୱାଗତ କରିଥିଲେ। ଏହି ପ୍ରଜ୍ଞାପନ ମେଢ଼ଟି ପ୍ରସିଦ୍ଧ କଟକ ବାଲିଯାତ୍ରା ବିଷୟରେ ଜନସାଧାରଣଙ୍କୁ ଅବଗତ କରାଇବା ପାଇଁ ଏକ ସଚେତନତା ଅଭିଯାନର ଅଂଶବିଶେଷ। ଐତିହାସିକ ବାଲିଯାତ୍ରା ଏବଂ ପ୍ରାଚୀନ କଳିଙ୍ଗ ଏବଂ ବାଲି, ଜାଭା, ସୁମାତ୍ରା ଓ ବୋର୍ଣ୍ଣିଓ ଭଳି ଦକ୍ଷିଣ-ପୂର୍ବ ଏସୀୟ ଦେଶ ମଧ୍ୟରେ ଚାଲିଥିବା ସାମୁଦ୍ରିକ ନୌବାଣିଜ୍ୟର ଗୌରବମୟ ଅତୀତର ବାର୍ତ୍ତା ନେଇ ଏହି ମେଢଟି ଓଡ଼ିଶାର ବିଭିନ୍ନ ଜିଲ୍ଲାରେ ଭ୍ରମଣ କରୁଅଛି। ଏହା ବ୍ୟାସନଗର ଓ ତା’ପରେ ଚଣ୍ଡିଖୋଲ ଅଭିମୁଖେ ଯିବା ପରେ ପଡ଼ୋଶୀ କେନ୍ଦ୍ରାପଡ଼ା ଜିଲ୍ଲା ଅଭିମୁଖେ ଯିବାକୁ କାର୍ଯ୍ୟସୂଚୀ ରହିଛି। ଏହି ସଚେତନତା ରଥର ଭ୍ରମଣ ହେଉଛି କଟକ ଜିଲ୍ଲା ପ୍ରଶାସନର ଏକ ପଦକ୍ଷେପ, ଯାହା ପ୍ରାଚୀନ ଓଡ଼ିଆ ସାଧବମାନଙ୍କ ଦୁଃସାହସିକ ଯାତ୍ରାକୁ ସ୍ମରଣ କରୁଥିବା ବାଲିଯାତ୍ରା ଉତ୍ସବର ଐତିହାସିକ ତଥା ସାଂସ୍କୃତିକ ଗଭୀରତାକୁ ଅଧିକ ଜନସାଧାରଣଙ୍କ ନିକଟରେ ପହଞ୍ଚାଇବା ଲକ୍ଷ୍ୟରେ କରାଯାଇଛି।
