୧ କୋଟି ୧୫ ଲକ୍ଷ ଟଙ୍କା ସରକାରୀ ଅର୍ଥ ହେରଫେର! ଭିଜିଲାନ୍ସ ଜାଲରେ ଜୁନିୟର ଆସିଷ୍ଟାଣ୍ଟ
ସରକାରୀ ଟଙ୍କା ହଡ଼ପ ଅଭିଯୋଗରେ ଜୁନିୟର ଆସିଷ୍ଟାଣ୍ଟ ଗିରଫ
ସମ୍ବଲପୁର: ସରକାରୀ ଅର୍ଥରେ ବଡ଼ ଧରଣର ହେରଫେର ଅଭିଯୋଗରେ ଓଡ଼ିଶା ଭିଜିଲାନ୍ସ ଜଣେ ଜୁନିୟର ଆସିଷ୍ଟାଣ୍ଟଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଉଛନ୍ତି ମିର୍ ଇମତିଆଜ୍ ଅଲୀ, ଯିଏ ସମ୍ବଲପୁର ଜିଲ୍ଲାର ଫାସିମାଲ ଓ ଗୋବିନ୍ଦପୁର ସିଏଚ୍ସିରେ ଜୁନିୟର ଆସିଷ୍ଟାଣ୍ଟ ଭାବେ କାର୍ଯ୍ୟରତ ଥିଲେ। ଭିଜିଲାନ୍ସର ତଦନ୍ତ ଅନୁସାରେ, ୨୦୨୧-୨୨ରୁ ୨୦୨୬-୨୭ ଆର୍ଥିକ ବର୍ଷ ମଧ୍ୟରେ ଅଭିଯୁକ୍ତ ଅବସରପ୍ରାପ୍ତ କର୍ମଚାରୀଙ୍କ ନାମରେ ମିଥ୍ୟା ଅନଲାଇନ୍ ଓ ଅଫଲାଇନ୍ ବିଲ୍ ପ୍ରସ୍ତୁତ କରିଥିବା ଅଭିଯୋଗ ହୋଇଛି। ଏଥିରେ ବକେୟା ଦରମା, ବ୍ୟବହାର ହୋଇନଥିବା ଛୁଟିର ଟଙ୍କା ଏବଂ ପ୍ରୋଭିଜନାଲ୍ ପେନସନ୍ ଭଳି ବିଭିନ୍ନ ଆର୍ଥିକ ମୁଖ୍ୟରେ ବିଲ୍ ପ୍ରସ୍ତୁତ କରାଯାଇଥିଲା। ଅଭିଯୋଗ ଅନୁସାରେ, ଫାସିମାଲ ସିଏଚ୍ସିରେ କାର୍ଯ୍ୟରତ ସମୟରେ ଅବସରପ୍ରାପ୍ତ କର୍ମଚାରୀଙ୍କ ପ୍ରାପ୍ୟ ଟଙ୍କା ସେମାନଙ୍କୁ ନଦେଇ ଭିନ୍ନ ଉପାୟରେ ନିଜ ବ୍ୟାଙ୍କ ଖାତାକୁ ପଠାଇଥିଲେ। ଏହି ଉପାୟରେ ୭୦ ଲକ୍ଷ ୫୭ ହଜାର ୪୫୦ ଟଙ୍କା ହେରଫେର କରାଯାଇଥିବା ଭିଜିଲାନ୍ସ ତଦନ୍ତରୁ ଜଣାପଡ଼ିଛି।ସେହିପରି, ଗୋବିନ୍ଦପୁର ସିଏଚ୍ସିରେ ଜୁନିୟର ଆସିଷ୍ଟାଣ୍ଟ ଭାବେ କାର୍ଯ୍ୟରତ ସମୟରେ ମଧ୍ୟ ସମାନ ଢଙ୍ଗରେ ସରକାରୀ ଅର୍ଥ ହେରଫେର କରିଥିବା ଅଭିଯୋଗ ହୋଇଛି। ସେଠାରେ ୪୪ ଲକ୍ଷ ୫୭ ହଜାର ୮୯ ଟଙ୍କା ହେରଫେର ହୋଇଥିବା ଭିଜିଲାନ୍ସ କହିଛି। ଏହି ଦୁଇଟି ଘଟଣାକୁ ମିଶାଇ ମୋଟ ୧ କୋଟି ୧୫ ଲକ୍ଷ ୧୪ ହଜାର ୫୩୯ ଟଙ୍କା ସରକାରୀ ଅର୍ଥ ହେରଫେର ହୋଇଥିବା ଅଭିଯୋଗ ରହିଛି। ଏହି ମାମଲାରେ ଓଡ଼ିଶା ଭିଜିଲାନ୍ସ ପକ୍ଷରୁ ସମ୍ବଲପୁର ଭିଜିଲାନ୍ସ ଥାନାରେ କେସ୍ ନମ୍ବର ୧୪ ଓ ୧୫, ତାରିଖ ୦୮ ସେପ୍ଟେମ୍ବର ୨୦୨୬ରେ ମାମଲା ରୁଜୁ ହୋଇଛି। ଅଭିଯୁକ୍ତଙ୍କ ବିରୋଧରେ Prevention of Corruption Act, 1988ର ସମ୍ପର୍କିତ ଧାରା ସହିତ BNS, 2023ର ଧାରା ୩୧୬(୫) ଅନୁଯାୟୀ ମାମଲା ରୁଜୁ କରାଯାଇଛି। ଗିରଫ ପରେ ଅଭିଯୁକ୍ତ ମିର୍ ଇମତିଆଜ୍ ଅଲୀଙ୍କୁ ସମ୍ବଲପୁର ସ୍ୱତନ୍ତ୍ର ଭିଜିଲାନ୍ସ କୋର୍ଟରେ ହାଜର କରାଯିବ। ଘଟଣାର ତଦନ୍ତ ଏବେ ମଧ୍ୟ ଜାରି ରହିଛି।