ଜମି ମାପ ତାରିଖ ଧରାଇବାକୁ ୩୦ ହଜାର ଟଙ୍କା ଲାଞ୍ଚ : ବିଂଝାରପୁର ତହସିଲଦାର ବିଜିଲାନ୍ସ ଜାଲରେ
ଜମି ମାପ ତାରିଖ ଧରାଇବାକୁ ୩୦ ହଜାର ଟଙ୍କା ଲାଞ୍ଚ : ବିଂଝାରପୁର ତହସିଲଦାର ବିଜିଲାନ୍ସ ଜାଲରେ
ଯାଜପୁର ଜିଲ୍ଲା ବିଂଝାରପୁର ତହସିଲର ଅତିରିକ୍ତ ତହସିଲଦାର ତଥା ଭାରପ୍ରାପ୍ତ ତହସିଲଦାର ଶ୍ରୀ ପ୍ରଦୀପ୍ତ କୁମାର ସେଠୀଙ୍କୁ ଆଜି ଅର୍ଥାତ ୧୯.୧୨.୨୦୨୫ ତାରିଖରେ ଓଡ଼ିଶା ବିଜିଲାନ୍ସ ଲାଞ୍ଚ ନେଉଥିବା ବେଳେ ସିଧହାତ ଧରିଛି।
ଖବର ଅନୁସାରେ, ଜଣେ ଜମି ମାଲିକଙ୍କ ନିଜସ୍ୱ ଜମି ଓ ସରକାରୀ ଜମି ସୀମା ନିର୍ଦ୍ଧାରଣ (ଡିମାର୍କେସନ) କରିବା ପାଇଁ ତାରିଖ ଧରାଇଦେବା ନିମିତ୍ତରେ ଶ୍ରୀ ସେଠୀ ୩୦ ହଜାର ଟଙ୍କା ଲାଞ୍ଚ ଦାବି କରିଥିଲେ। ଉକ୍ତ ସରକାରୀ ଜମିରେ ବାଲି ଖଣିକୁ ଯିବା ପାଇଁ ରାସ୍ତା ନିର୍ମାଣ ହେବାକୁ ଥିବା ଜଣାପଡ଼ିଛି।
ଲାଞ୍ଚ ଦାବିରେ ଅସନ୍ତୁଷ୍ଟ ଜମି ମାଲିକ ବିଜିଲାନ୍ସ ନିକଟରେ ଅଭିଯୋଗ କରିବା ପରେ ଯୋଜନାବଦ୍ଧ ଟ୍ରାପ୍ ରଚନା କରାଯାଇଥିଲା। ଅଭିଯୋଗକାରୀଙ୍କ ଠାରୁ ୩୦ ହଜାର ଟଙ୍କା ଲାଞ୍ଚ ଗ୍ରହଣ କରୁଥିବା ସମୟରେ ବିଜିଲାନ୍ସ ଟିମ୍ ଶ୍ରୀ ସେଠୀଙ୍କୁ ଧରିଥିଲା। ତାଙ୍କ ନିକଟରୁ ସମ୍ପୂର୍ଣ୍ଣ ଲାଞ୍ଚ ଟଙ୍କା ଜବତ କରାଯାଇଛି।
ଏହି ଘଟଣା ସମ୍ପର୍କରେ କଟକ ବିଜିଲାନ୍ସ ଥାନା ମାମଲା ନଂ–୩୬/୨୦୨୫, ଦୁର୍ନୀତି ନିବାରଣ (ସଂଶୋଧନ) ଆଇନ ୨୦୧୮ ର ଧାରା ୭ ଅନୁଯାୟୀ ମାମଲା ରୁଜୁ କରାଯାଇଛି। ଘଟଣା ସମ୍ପର୍କରେ ଅଧିକ ତଦନ୍ତ ଜାରି ରହିଛି।