ଧର୍ମଶାଳାରେ ବିଜେପିର ବିଶାଳ ମିଶ୍ରଣ ପର୍ବ ଆୟୋଜିତ

ଯାଜପୁର:(kalinga7news) ଯାଜପୁର ଜିଲ୍ଲାର ଧର୍ମଶାଳା ବ୍ଲକ ଅନ୍ତର୍ଗତ କୁମାରୀ ଅଞ୍ଚଳରେ ଅବସ୍ଥିତ ବିଜେପି କାର୍ଯ୍ୟାଳୟରେ ଆଜି ଏକ ବିଶାଳ ମିଶ୍ରଣ ପର୍ବ ଆୟୋଜିତ ହୋଇଥିଲା। ଏହି ଅବସରରେ ଶତାଧିକ ବିଜୁ ଜନତା ଦଳ (ବିଜେଡି) କର୍ମୀ ଓ ସମର୍ଥକମାନେ ଭାରତୀୟ ଜନତା ପାର୍ଟି (ବିଜେପି)ରେ ସାମିଲ ହୋଇଥିଲେ। ସାମିଲ ହୋଇଥିବା କର୍ମୀମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନୀତି ଓ ଆଦର୍ଶରେ ପ୍ରଭାବିତ ହେବା ସହିତ ରାଜ୍ୟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସୁଶାସନ ଏବଂ ଧର୍ମଶାଳା ବିଧାୟକ ହିମାଂଶୁ ଶେଖର ସାହୁଙ୍କ ନେତୃତ୍ୱ ପ୍ରତି ଆସ୍ଥା ପ୍ରକଟ କରିଥିଲେ।ମିଶ୍ରଣ ପର୍ବରେ ଯାଜପୁର ଜିଲ୍ଲା ବିଜେପି ସଭାପତି ଶ୍ରୀମତୀ ଦେବଯାନୀ ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇ ନବସାମିଲ କର୍ମୀମାନଙ୍କୁ ସ୍ୱାଗତ କରିଥିଲେ। ସେ କହିଥିଲେ ଯେ, ବିଜେପିର ଜନମୁଖୀ ନୀତି ଓ ବିକାଶମୂଳକ କାର୍ଯ୍ୟକ୍ରମ ଦେଖି ଲୋକମାନଙ୍କର ଦଳ ପ୍ରତି ଆସ୍ଥା ଦିନକୁ ଦିନ ବଢୁଛି। ଏହାସହିତ କାର୍ଯ୍ୟକ୍ରମରେ ପୂର୍ବତନ ସାଂସଦ, ଧର୍ମଶାଳା ବ୍ଲକ ଅଧ୍ୟକ୍ଷ, ଜିଲ୍ଲା ପରିଷଦ ସଦସ୍ୟ ଓ ଅନ୍ୟାନ୍ୟ ବରିଷ୍ଠ ନେତାମାନେ ଉପସ୍ଥିତ ରହିଥିଲେ। ସେମାନେ ମଧ୍ୟ ନବସାମିଲ କର୍ମୀମାନଙ୍କୁ ଦଳରେ ସ୍ୱାଗତ କରି ସଂଗଠନକୁ ଆହୁରି ମଜବୁତ କରିବାକୁ ଆହ୍ୱାନ କରିଥିଲେ।

ଏହି କାର୍ଯ୍ୟକ୍ରମରେ ବହୁ ସଂଖ୍ୟକ ଦଳୀୟ କର୍ମୀ ଓ ସମର୍ଥକଙ୍କ ଉପସ୍ଥିତି ଦେଖିବାକୁ ମିଳିଥିଲା। ଏହି ମିଶ୍ରଣ ପର୍ବ ଧର୍ମଶାଳା ଅଞ୍ଚଳରେ ବିଜେପିର ବୃଦ୍ଧିଶୀଳ ପ୍ରଭାବକୁ ସ୍ପଷ୍ଟ କରୁଥିବା ବେଳେ ଆଗାମୀ ରାଜନୈତିକ ପରିସ୍ଥିତିରେ ଏହାର ପ୍ରଭାବ ପଡିବ ବୋଲି ଆଲୋଚନା ହେଉଛି।ସ୍ଥାନୀୟ ରାଜନୈତିକ ମହଳରେ ଏହି ଘଟଣାକୁ ନେଇ ବିଭିନ୍ନ ପ୍ରତିକ୍ରିୟା ଆସୁଥିବା ବେଳେ, ଏହାକୁ ବିଜେପି ପାଇଁ ଏକ ବଡ଼ ସଫଳତା ଭାବେ ଦେଖାଯାଉଛି।