ସମୟୋପଯୋଗୀ କ୍ଲେଫ୍ଟ ସର୍ଜରୀ ବଦଳାଇପାରେ ଶିଶୁଙ୍କ ଜୀବନ : ଜେପି ହସ୍ପିଟାଲରେ ବିଶ୍ୱ କ୍ଲେଫ୍ଟ ସଚେତନତା ଦିବସ ପାଳିତ

ସମୟୋପଯୋଗୀ କ୍ଲେଫ୍ଟ ସର୍ଜରୀ ବଦଳାଇପାରେ ଶିଶୁଙ୍କ ଜୀବନ : ଜେପି ହସ୍ପିଟାଲରେ ବିଶ୍ୱ କ୍ଲେଫ୍ଟ ସଚେତନତା ଦିବସ ପାଳିତ

ରାଉରକେଲାସ୍ଥିତ ଜେପି ହସ୍ପିଟାଲରେ ବୁଧବାର ବିଶ୍ୱ କ୍ଲେଫ୍ଟ (ଖଣ୍ଡିଆ ଓଠ ଓ ତାଳୁ) ସଚେତନତା ଦିବସ ପାଳନ କରାଯାଇଛି। ଏହି ଅବସରରେ ଖଣ୍ଡିଆ ଓଠ ଓ ତାଳୁ ସମସ୍ୟାର ଶୀଘ୍ର ଚିହ୍ନଟ, ସଠିକ୍ ସମୟରେ ସର୍ଜରୀ ଏବଂ ପରବର୍ତ୍ତୀ ଚିକିତ୍ସା ମାଧ୍ୟମରେ ଶିଶୁଙ୍କ ଜୀବନରେ କିପରି ସକାରାତ୍ମକ ପରିବର୍ତ୍ତନ ଆଣିହେବ, ସେନେଇ ସଚେତନତା ସୃଷ୍ଟି କରାଯାଇଥିଲା।
ଏହି କାର୍ଯ୍ୟକ୍ରମରେ ଜେପି ହସ୍ପିଟାଲର ଡିନ୍ ତଥା ସିଇଓ ଡାକ୍ତର ଦେବେନ୍ଦ୍ର ମିଶ୍ର, ମେଡିକାଲ୍ ସୁପରିଣ୍ଟେଣ୍ଡେଣ୍ଟ ଡାକ୍ତର ସୁଚିତ୍ରା ମିଶ୍ର, କ୍ରାନିଓଫେସିଆଲ୍ ସର୍ଜନ ଡାକ୍ତର ପ୍ରିୟଙ୍କା ଭୋଇ, ଆସିଷ୍ଟାଣ୍ଟ ସିଓଓ ତନ୍ଦ୍ରା ପ୍ରିୟଦର୍ଶିନୀ ମିଶ୍ରଙ୍କ ସମେତ ହସ୍ପିଟାଲର ବରିଷ୍ଠ ଅଧିକାରୀ ଓ ନର୍ସିଂ କର୍ମଚାରୀମାନେ ଉପସ୍ଥିତ ଥିଲେ।
କ୍ଲେଫ୍ଟ ସର୍ଜରୀ ମାଧ୍ୟମରେ ସୁସ୍ଥ ହୋଇଥିବା ଶିଶୁ ଏବଂ ସେମାନଙ୍କ ପରିବାରବର୍ଗ ନିଜ ଅନୁଭୂତି ବାଣ୍ଟିବା ସହ ହସ୍ପିଟାଲର ଡାକ୍ତରୀ ଦଳ ପ୍ରତି କୃତଜ୍ଞତା ଜଣାଇଥିଲେ।
ଏହି ଅବସରରେ କ୍ରାନିଓଫେସିଆଲ୍ ସର୍ଜନ ଡାକ୍ତର ପ୍ରିୟଙ୍କା ଭୋଇ କହିଥିଲେ ଯେ, ପ୍ରାରମ୍ଭିକ ରୋଗ ନିର୍ଣ୍ଣୟ, ସଠିକ୍ ସମୟରେ ସର୍ଜରୀ ଏବଂ ସର୍ଜରୀ ପରବର୍ତ୍ତୀ ସ୍ପିଚ୍ ଥେରାପି ଶିଶୁଙ୍କ ସୁସ୍ଥ ଭବିଷ୍ୟତ ପାଇଁ ଅତ୍ୟନ୍ତ ଜରୁରୀ। କ୍ଲେଫ୍ଟ ସର୍ଜରୀ କେବଳ ମୁହଁର ଗଠନରେ ପରିବର୍ତ୍ତନ ଆଣେ ନାହିଁ, ବରଂ ଶିଶୁଙ୍କ ଖାଇବା, ଶ୍ୱାସକ୍ରିୟା ଏବଂ ସ୍ପଷ୍ଟ ଭାବେ କଥା କହିବା କ୍ଷମତାର ମଧ୍ୟ ଉନ୍ନତି ଘଟାଇଥାଏ।
ଡାକ୍ତର ଦେବେନ୍ଦ୍ର ମିଶ୍ର ଓ ଡାକ୍ତର ସୁଚିତ୍ରା ମିଶ୍ର କହିଥିଲେ ଯେ, ଜେପି ହସ୍ପିଟାଲ ଏହି ଅଞ୍ଚଳରେ ଉନ୍ନତ ସର୍ଜିକାଲ୍ ସେବା, ଜନସଚେତନତା ଏବଂ ମାନବିକ ସ୍ୱାସ୍ଥ୍ୟସେବା ପ୍ରଦାନ ପାଇଁ ସଦା ପ୍ରତିବଦ୍ଧ।
କାର୍ଯ୍ୟକ୍ରମ ଶେଷରେ ହସ୍ପିଟାଲର ମେଡିକାଲ୍ ଓ ନର୍ସିଂ ଟିମ୍‌କୁ ସମ୍ବର୍ଦ୍ଧିତ କରାଯିବା ସହ ଲାଭାର୍ଥୀ ପରିବାରଙ୍କ ସହ ମତବିନିମୟ କରାଯାଇଥିଲା। ପରେ କେକ୍ କାଟି ବିଶ୍ୱ କ୍ଲେଫ୍ଟ ସଚେତନତା ଦିବସ ପାଳନ କରାଯାଇଥିଲା।