ଆମ୍ ଆଦମୀ ପାର୍ଟିର ରାଷ୍ଟ୍ରୀୟ ପରିଷଦକୁ ନିର୍ବାଚିତ ହେଲେ ଜୟସୂର୍ଯ୍ୟ କାନୁନଗୋ*

*ଆମ୍ ଆଦମୀ ପାର୍ଟିର ରାଷ୍ଟ୍ରୀୟ ପରିଷଦକୁ ନିର୍ବାଚିତ ହେଲେ ଜୟସୂର୍ଯ୍ୟ କାନୁନଗୋ*

ଭୁବନେଶ୍ୱର, ୩୦ ଜୁଲାଇ: ସଦ୍ୟ ସମାପ୍ତ ହୋଇଥିବା ଆମ୍ ଆଦମୀ ପାର୍ଟିର ସାଙ୍ଗଠନିକ ନିର୍ବାଚନରେ ବିଶିଷ୍ଟ ସମାଜସେବୀ ଓ ସକ୍ରିୟ ରାଜନୈତିକ କର୍ମୀ ଶ୍ରୀ ଜୟସୂର୍ଯ୍ୟ କାନୁନଗୋ ଦଳର ସର୍ବୋଚ୍ଚ ନୀତି ନିର୍ଦ୍ଧାରଣକାରୀ ସଂସ୍ଥା **ରାଷ୍ଟ୍ରୀୟ ପରିଷଦ (National Council)**ର ସଦସ୍ୟ ଭାବେ ନିର୍ବାଚିତ ହୋଇଛନ୍ତି। ଏହାକୁ ଓଡ଼ିଶାର ଆମ୍ ଆଦମୀ ପାର୍ଟି ପାଇଁ ଏକ ଗୁରୁତ୍ୱପୂର୍ଣ୍ଣ ସଫଳତା ଓ ନୂଆ ଅଧ୍ୟାୟର ଆରମ୍ଭ ବୋଲି ଦଳୀୟ କର୍ମୀମାନେ ମତ ପ୍ରକାଶ କରିଛନ୍ତି।

ଏହି ଅବସରରେ ଶ୍ରୀ କାନୁନଗୋ ଆମ୍ ଆଦମୀ ପାର୍ଟିର ଜାତୀୟ ସଂଯୋଜକ ଶ୍ରୀ ଅରବିନ୍ଦ କେଜ୍ରିୱାଲଙ୍କ ପ୍ରତି ଆନ୍ତରିକ କୃତଜ୍ଞତା ଜଣାଇବା ସହିତ ଆମ୍ ଆଦମୀ ପାର୍ଟି, ଓଡ଼ିଶାର ରାଜ୍ୟ ସଭାପତି ଶ୍ରୀ ନିଶିକାନ୍ତ ମହାପାତ୍ରଙ୍କୁ ସ୍ୱତନ୍ତ୍ର ଭାବେ ଧନ୍ୟବାଦ ଜଣାଇଛନ୍ତି। ସେ କହିଛନ୍ତି ଯେ, ଶ୍ରୀ ନିଶିକାନ୍ତ ମହାପାତ୍ର ତାଙ୍କ ଉପରେ ଆସ୍ଥା ଓ ବିଶ୍ୱାସ ପ୍ରକାଶ କରି ରାଷ୍ଟ୍ରୀୟ ପରିଷଦରେ କାର୍ଯ୍ୟ କରିବାର ସୁଯୋଗ ଦେଇଥିବାରୁ ସେ ତାଙ୍କ ପ୍ରତି କୃତଜ୍ଞ। ଏହି ଦାୟିତ୍ୱକୁ ସେ ସମ୍ପୂର୍ଣ୍ଣ ନିଷ୍ଠା, ସଚ୍ଚୋଟତା ଓ ଜନସେବାର ମନୋଭାବ ସହ ପାଳନ କରିବେ ବୋଲି ପ୍ରକାଶ କରିଛନ୍ତି।

ଶ୍ରୀ କାନୁନଗୋ କହିଛନ୍ତି, ଆଗାମୀ ନିର୍ବାଚନରେ ଆମ୍ ଆଦମୀ ପାର୍ଟି ଓଡ଼ିଶାରେ ସମ୍ପୂର୍ଣ୍ଣ ଶକ୍ତିର ସହ ମଇଦାନକୁ ଓହ୍ଲାଇବ। ଗାଁରୁ ସହର ପର୍ଯ୍ୟନ୍ତ ସଂଗଠନକୁ ସୁଦୃଢ଼ କରାଯିବ ଏବଂ ସ୍ୱଚ୍ଛ ରାଜନୀତି, ଦୁର୍ନୀତିମୁକ୍ତ ଶାସନ, ଉନ୍ନତ ଶିକ୍ଷା, ଗୁଣାତ୍ମକ ସ୍ୱାସ୍ଥ୍ୟସେବା ଏବଂ ସାଧାରଣ ଲୋକଙ୍କ ମୌଳିକ ସମସ୍ୟାର ସମାଧାନକୁ ନେଇ ଦଳ ଲୋକଙ୍କ ଆସ୍ଥା ହାସଲ କରିବାକୁ ପ୍ରୟାସ କରିବ।

ସେ ଆହୁରି କହିଛନ୍ତି, ଓଡ଼ିଶାରେ ଏକ ସକ୍ଷମ, ସଚ୍ଚୋଟ ଓ ଜନମୁଖୀ ରାଜନୈତିକ ବିକଳ୍ପ ସୃଷ୍ଟି କରିବା ହିଁ ଦଳର ପ୍ରମୁଖ ଲକ୍ଷ୍ୟ। ସମାଜର ସମସ୍ତ ବର୍ଗର ଲୋକଙ୍କୁ ଏହି ପରିବର୍ତ୍ତନର ଅଭିଯାନରେ ସାମିଲ ହେବାକୁ ସେ ଆହ୍ୱାନ ଜଣାଇଛନ୍ତି।

ଶ୍ରୀ କାନୁନଗୋ ତାଙ୍କ ନିର୍ବାଚନ ପାଇଁ ଦଳର ସମସ୍ତ କର୍ମୀ, ସମର୍ଥକ ଓ ଶୁଭେଚ୍ଛୁମାନଙ୍କୁ ଧନ୍ୟବାଦ ଜଣାଇ କହିଛନ୍ତି ଯେ, ସମସ୍ତଙ୍କ ସହଯୋଗ ଓ ସକ୍ରିୟ ଅଂଶଗ୍ରହଣରେ ଆମ୍ ଆଦମୀ ପାର୍ଟି ଓଡ଼ିଶାରେ ଏକ ଶକ୍ତିଶାଳୀ ଜନଆନ୍ଦୋଳନରେ ପରିଣତ ହେବ ଏବଂ ଆଗାମୀ ନିର୍ବାଚନରେ ଦୃଢ଼ ଉପସ୍ଥିତି ଦର୍ଶାଇବ।